(мулоҳизае чанд оид ба соҳаи тандурустӣ дар замони Истиқлолияти давлатӣ)

Соҳаи тандурустӣ яке аз самтҳои аввалиндараҷаи сиёсати иҷтимоии давлати Тоҷикистон ба шумор рафта, дар давоми қариб се даҳсолаи охир бомаром рушд карда, то ба имрӯз ба пешравиҳои назаррас ноил гардидааст.

Эмомалӣ Раҳмон

Дар воқеъ соҳаи тандурустии кишвар аз самтҳои асосии сиёсати иҷтимоии кишвар буда, бо ба даст овардани истиқлолияти давлатӣ заминаҳои рушди он бо марому вусъати илҳомбхаш ташаккул меёбад. Агар ба давраи 32-соли Истиқлолияти давлатӣ ва дастовардҳову бурдбориҳои беназир ва ободкориву бунёдкорӣ ба ин соҳа назар намоем, амиқ мегардад, ки аз он ҳама дастовардҳо наметавон дар як мақола ёд карду ба тафсил навишт. Мо дар ин навишта мекушем, танҳо чанде аз рақамаҳое, ки воқеан рушдиҳандаи соҳаи тандурустии кишвар дар замони истиқлолият ба даст омадаанд, рӯй орем.

Ҳанӯз, аз оғози давлатдории навини тоҷик, яъне бо ба даст овардани Итсиқлолияти давлатӣ, Ҳукумати мамлакат пайваста барои беҳтарнамоии соҳаи тандурустии кишвар талош дошт ва сол аз сол пояҳои техникӣ, сифати хизматрасонӣ, мукаммалшавии инфрасохтор ва неруи кадрии соҳаро тақвият мебахшид ва рушди ин соҳаи афзалиятноки ҷомеа ба меъёрҳои замони муосир мутобиқ гардонда шудааст.

Аз рӯзҳои аввали соҳибистиқлолӣ дар доираи ислоҳоти соҳаи тандурустӣ сараввал як қатор санадҳои меъёрӣ-ҳуқуқии соҳа таҷдиди назар ва аз нав таҳия ва тасдиқ гардида, маблағгузорӣ ба он аз ҳисоби буҷети давлатӣ сол аз сол зиёд гардида, инфрасохтори соҳаи тиббӣ ба маротиб рушд намуд.

Аз ин нуктаи назар, агар ба оморҳои соҳаи тандурустии Тоҷикистони азиз дар 32-соли соҳибистиқлолӣ назар намоем, маълум мегардад, ки то соли 1991 дар кишвари мо ҳамагӣ 2862 муассисаи тандурустӣ фаъолият дошта, пас дар замони соҳибистиқлолӣ ин шумора қариб ду баробар афзудааст, яъне танҳо то соли 2020 он ба 4369 адад расонида шудааст, ки дар ин давра 1507 муассиса зиёд гардидааст.

Боиси хушҳолӣ ва хушбахтии миллати тоҷик аст, ки имрӯзҳо дар дурдастарин деҳаҳои Тоҷикистон дар доираи тантанаҳои Истиқлолияти давлатӣ ва бахшида ба “Солҳои рушди саноат» эълон намудани солҳои 2022-2026 марказҳои саломатӣ ва бунгоҳҳои тиббӣ сохта ба истифода дода шуда истодааст.

Чуноне ки ишора намудем, тандурустӣ аз соҳаҳои муҳимтарини иҷтимоӣ ба ҳисоб меравад, аз ин нигоҳ Ҳукумати Ҷумҳурии Тоҷикистон дар даврони Истиқлолият маблағгузории ин соҳаи иҷтимоиро ҳамасола зиёд намуда, то 2,1 миллиард сомонӣ расонид.

Ба дурустӣ метавон дарк намуд, ки сиёсати пайгиронаи Пешвои миллат ва Ҳукумати ҷумҳурӣ ҷиҳати рушди соҳаҳои тандурустӣ дар даврони истиқлолият самараҳои наку ба бор овардааст. Зеро, дар замони соҳибистиқлолӣ ҳамчунин барои рушди ин соҳа илова ба маблағҳои аз буҷет ҷудошуда зиёда аз 120 лоиҳаи сармоягузории давлатӣ амалӣ гардидаву даҳҳо лоиҳаҳои дигар дар татбиқи амалишавӣ қарор доранд.

Ташаббусҳои созандаву бунёдкоронаи Асосгузори сулҳу ваҳдати миллӣ-Пешвои миллат, Президенти маҳбуби кишвар Эмомалӣ Раҳмон аст, ки аз рӯйи барномаҳои қабулшудаи соҳа ва лоиҳаҳои таҳрезигардида, ба муассисаҳои тибби кишвар таҷҳизоти муосир ва технологияҳои замонавӣ ворид гардидаву боиси беҳтар шудани сифати ташхис, муоина ва табобати беморон замина ба вуҷуд овардааст. Натиҷаи ҳамин аст, ки имрӯз ба кишварҳои хориҷӣ барои табобат рафтани шаҳрвандони мо хеле кам шудааст.

Бо дарназардошти баланд бардоштани сатҳи касбияти кадрҳои соҳаи тибби кишвар, дар низоми таълимии соҳаи тандурустӣ барои тарбияи мутахассисони соҳа чандин санадҳои меъёрӣ қабул гардиданд, ки онҳо як навъ такондиҳанда дар вусъат ёфтани сатҳу сифати хизматрасонии ин соҳа нақши муҳим бозидаанд. Аз ҷумлаи ин санадҳои барои соҳа бисёр муҳим Консепсияи ислоҳоти таҳсилоти тиббӣ ва фарматсевтӣ дар Ҷумҳурии Тоҷикистон, Барномаи рушди Донишгоҳи давлатии тиббии Тоҷикистон ба номи Абуалӣ ибни Сино дар солҳои 2006–2015, Барномаи тайёр намудани кадрҳои тиббӣ барои солҳои 2010–2020 аз ҷумлаи онҳоянд.

Дар идомаи андешаҳои хеш мо наметавонем аз дастоварди беназир ва барои миллати тоҷик бисёр ҳам зарурӣ дар соҳаи тандурустӣ, ки он ҳам сохта ба истифода додани Маҷмааи тандурустии “Истиқлол” дар пойтахти кишварамон шаҳри Душанбе дар соли 2016 мебошад, ёдовар нашавем. Дар ин маврид, Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ҳанӯз 4-уми марти соли 2016 зимни ифтитоҳи МД “Маҷмааи тандурустии Истиқлол” онро бузургтарин иншооти соҳаи тандурустии кишвар дар замони соҳибистиқлолӣ номиданд, зеро дар муассисаи мазкур 1000 ҳуҷраи тахассусӣ, 650 кати табобатӣ, аз ҷумла 150 кати калонсолон, 182 кати ҷарроҳии кӯдакона, 213 кати соматикии кӯдакона, 100 кати таваллудхона мавҷуд аст. Маҷмаа нахустин муассисаи бисёрсоҳавии тиббии кишвар мебошад, ки мутобиқ ба талаботи меъёрҳои байналмилалӣ бунёд гардида, зинаҳои ташхис, табобат, аз ҷумла хадамоти ёрии фаврии тиббиро дар бар мегирад.

Боиси ифтихор аст, ки 1.09.2020 Асосгузори сулҳу ваҳдати миллӣ-Пешвои миллат, Президенти кишвар мӯҳтарам Эмомалӣ Раҳмон бинои нави МДТ “ Коллеҷи тиббии ҷумҳуриявӣ” – ро мавриди баҳрабардорӣ қарор доданд. Бинои нави муассиса бо тарҳи муосир бунёд шуда, аз 6-ошёна ва таҳхона иборат мебошад. Ёдовар мешавем, ки МДТ “ Коллеҷи тиббии ҷумҳуриявӣ ” таърихи 88-сола дошта, ҳануз соли 1935 таъсис ёфтааст.

Мавриди зикр аст, ки бинои навсохти МДТ “ Коллеҷи тиббии ҷумҳуриявӣ ” дорои 28-кафедра, 146- синфхона ва 8 – толори барҳавоӣ лексионӣ мебошад, ки бо мизу курсӣ , аёниятҳои таълимӣ ва муосиртарин технология аз қабили тахтаҳои электронӣ ва видеопроекторҳо муҷаҳҳаз мебошанд.

Хурсандиовар аст, ки ба муносибати сазовор пешвоз гирифтани Ҷашни 32-солагии Истиқлолияти давлатии Ҷумҳурии Тоҷикистон дар саросари кишвари азизамон иқдомҳои наҷиби ободкориву созандагӣ, махсусан бунёд ва азнавсозии муассисаҳои тиббӣ, махсусан таълимгоҳҳои ба тамоми шароит ва имконият созгор ва таъсиси бунгоҳои тиббии ба кулли таҷҳизотҳои аввалия таҷҳизонидашуда ва барои мардум дастрас бомаром идома доранд.

32-солагии Истиқлолияти давлатии Ҷумҳурии Тоҷикистон муборак ҳамдиёрон ва ҳамкасбони азиз!

Муовини директор оид ба корҳои таълимии

МДТ “ Коллеҷи тиббии ҷумҳуриявӣ” н.и.т Одилзода И.Ё.

Декани факултети “ Кори табобатӣ”-и

МДТ “ Коллеҷи тиббии ҷумҳуриявӣ” Сафаров Х.С.