Муассисаи давлатии таълимии «Коллеҷи тиббии ҷумҳуриявӣ» таҳти роҳбарии номзади илмҳои тиб, Ашуриён Шаҳло Сайфуллозода аз соли 2019 то инҷониб бо ташкилоти бонуфузи байналмиллалии “Momentum wheels for humanity”, ки барои омодасозии мутахассисони салоҳиятноки соҳаи миёнаи касбии тиббӣ, ба муассисаҳои таълимии тамоми кишварҳои дунё кумаки методӣ мерасонад, ҳамкориҳои фаъол ва пурсамар ба роҳ мондааст.

Бо ташаббуси роҳбари муассиса, дар доираи Созишномаи ҳамкориҳои дуҷониба байни ташкилоти “Momentum wheels for humanity” ва МДТ “Коллеҷи тиббии ҷумҳуриявӣ” ва бо мақсади амиқтар намудани ҳамкориҳои дуҷониба санаи 30 ноябри соли 2022 бо ҳайати роҳбарияти ташкилоти мазкур вохӯрӣ барпо карда шуд. Ҳадафи аслии вохӯрии мазкур ин пайдо намудани шиносоӣ бо ҳайати навтаъиншудаи роҳбарияти ташкилоти мазкур, баррасии қадамҳои минбаъдаи ҳамкориҳои дуҷониба, аз қабили барпо намудани семинар-тренингҳои таълимӣ дар самти физиотерапия, ташкили синфхонаҳои симулятсионӣ ва таъмини он бо маводҳои таълимӣ ва таҷҳизотҳои омӯзишии тиббӣ буд.

Дар оғоз роҳбари Муассиса, н.и.т. Ашуриён Шаҳло Сайфуллозода меҳмонони гиромиқадрро барои ташриф овардан ба ин даргоҳ хайрамақдам гуфта, сипас ба қисмати протоколии гуфтушунид пардохта шуд. Зимнан роҳбари муассиса иброз доштанд, ки МДТ “Коллеҷи тиббии ҷумҳуриявӣ” тибқи созишномаҳои ҳамкорӣ тамоми вазифаҳои ба зимма гузоштаашро дар давоми солҳои ҳамкорӣ пурра иҷро кардааст.

Ташкилоти “Momentum wheels for humanity” барои барпо намудани гуфтушунидҳо дар ҳама самтҳо бо ҳайати зерин ташриф оварданд:

Хонум Мишел – сардори ҳайати корӣ, роҳбари ташкилоти “Momentum wheels for humanity”,

Хонум Мерсӣ – физиотерапевт, намояндаи ташкилоти зикргашта,

Хонум Линдсий – ҷонишини аввали роҳбари ташкилоти мазкур,

Ҳусейн Эгамназаров – сармутахассиси шӯъбаи муносибатҳои байналмилалии ДДТТ ба номи Абӯалӣ ибни Сино .

Ҷонибҳо дурнамои рушди ҳамкориҳои минбаъдаро баррасӣ намуда, барои идомаи ҳамкориҳои судманд изҳори розигӣ баён намуданд. Директори МДТ “Коллеҷи тиббии ҷумҳуриявӣ” Ашуриён Шаҳло Сайфуллозода таъқид сохтанд, ки самти ояндадори ҳамкориҳои дуҷониба ин табодули таҷриба бо давлатҳои пешқадам дар самти физиотерапия, ёрии методии ташкилот дар тарҷумаи адабиётҳои таълимии муосир, ташкил ва таъмини синфхонаҳои амалӣ баҳри таҷрибаомӯзии мутахассисони соҳавӣ мебошад ва ташкилоти мазкур таҳия ва татбиқи барномаҳои ҳамкориҳои муштарак дар ин самтро зарурӣ шуморид. Дар идомаи мулоқот ҷонибҳо тақозо доштанд, ки баъди ба итмом расидани ин ҳамкориҳо созишҳои нави ҳамкорӣ баста шаванд.

Пеш 1 то 8 саҳифа Баъдӣ