Омӯзгорони муҳтарам ва донишҷӯёни азиз!

Имрӯз мо Рӯзи забони модариро ҷашн мегирем ва мехоҳам ҳар яки шуморо бо ин ҷашни наҷиб табрик гӯям! Забони модарии мо на танҳо василаи муошират, балки иртиботи фарҳангӣ ва шиносоӣ бо ниёгони мост. Забони модарӣ “узви зиндаест”, ки афкор, ҳиссиёт ва ақидаи моро баён мекунад. Яъне ин калиди таърих, анъана ва арзишҳои миллии мост.

Забони тоҷикӣ баёнгари тамоми арзишҳои бузурги маънавии халқи мо буда, тамаддун ва фарҳанги куҳанбунёд, ки мо бо онҳо ифтихор мекунем, то ба имрӯз маҳз ба воситаи забони модариамон ҳифз гардидааст; бо он забони латифу нафисе, ки матнҳои беш аз ҳазору дусад сол қабл навишташудаашро мехонему мефаҳмем; бо он забоне, ки садҳову ҳазорҳо бузургони суханвари ин марзу бум эҷод кардаанд ва осори ҷовидонаи худро ба имрӯзиён мерос гузоштаанд.

Забони тоҷикӣ дар тӯли асрҳои зиёд ба сифати омили ваҳдатсозу муттаҳидкунанда хизмат карда, имрӯз низ ба мардуми мо барои таҳкими пояҳои давлатдории миллӣ ва пешрафту ободии Ватани аҷдодӣ илҳому нерӯ мебахшад.

Дар мушкилтарин давраҳои таърихӣ ва дар лаҳзаҳое, ки гузаштагони мо дар вартаи нобудӣ қарор доштанд, забон чун сипари миллат ба майдони набард баромада, мардумро ба иттиҳоду сарҷамъӣ ва ҳифзи марзу бум фаро хондааст.

Аз ин лиҳоз ҳифз ва гиромидошти забони модарӣ на танҳо қарзи мо дар назди ниёгон, балки қарзи мо дар назди насли оянда аст. Дар хотир доштан муҳим аст, ки забони модарӣ муқаддасоти беназир аст. Он шахсияти мо ва қобилияти баён кардани худро инъикос мекунад. Ҳар як калима, ҳар ибора, ҳар шеър дар забони модарии мо як зебоӣ аст, ки мо бояд онро қадр кунем ва пос дорем.

Бо истифода аз фурсати бадастоварда ба шумо таманниёти худро мерасонам. Бигзор забони модарии мо пайвандгари байни қалбу рӯҳ гардад ва ба мо кӯмак кунад, ки якдигарро беҳтар фаҳмем. Бигзор он пули байни наслҳо ва фарҳангҳо гардад. Дар ин рӯз ҳар яки шуморо даъват менамоям, ки ба эҳтиром ва муҳаббат ба забони модарии худ арҷ гузоред. Биёед онро ҳифз кунем, инкишоф диҳем ва ба фарзандону наберагонамон расонем. Бигзор забони модарии мо ҳамеша мояи ифтихору илҳом барои ҳамаи мо бошад.

Рӯзи забони давлатӣ муборак, дустони азиз! Бигзор забони модарии мо ҳамеша созгору зебо садо диҳад!

Бо орзуҳои беҳтарин,
директори мдт “Коллеҷи тиббии ҷумҳуриявӣ”,
номзади илмҳои тиб Ашуриён Шаҳло Сайфуллозода