Пеш 1 то 2 саҳифа Баъдӣ

“Мақсади стратегии давлат ва Ҳукумат дар соҳаи тандурустӣ – ин тавассути фаҳмондадиҳӣ ва таъкиди  тарзи ҳаёти солим таъмин кардани  сиҳатии аҳолӣ, беҳтар кардани нишондодҳои дарозумрӣ, паст крдани сатҳи бемориҳо, маъюбӣ, марги модару кӯдак, пешгирӣ аз касалиҳои гуногуни сироятӣ, хубтар кардани сифати ёрии тиббӣ ва беҳдоштӣ, назорати бехатарии доруворӣ ва тарбияи кадрҳои баландихтисоси соҳа мебошад”.

Эмомалӣ Раҳмон

Ибтидоии солҳои 90-уми асри гузашта давлати абарқудрати Иттиҳоди Шуравӣ барҳам хӯрду собиқ ҷумҳуриҳои шомили он соҳибихтиёр гардиданд. Тоҷикистони азизи мо ҳам истиқлолияти худро эълон кард ва ба бунёди ҷомеаи навини озод шуруъ намуд. Аммо давлати ҷавон бо дахолати гурӯҳҳои манфиатҷӯ, ки аз хориҷи кишвар пуштибонӣ мешуданд, ба гирдоби ҷанги таҳмилии шаҳрвандӣ кашида шуд. Вазъият дар кишвар ба дараҷае  муташанниҷ  гашта буд, ки касе барои зинда мондани худ бовар намекард. Душманони ватану миллат  садҳо иншооти давлатиро харобу валангор карда, ҳазорҳо нафар аҳолиро ба ҳалокат расонданд.

Дар чунин вазъияти барои давлату миллат тақдирсоз касе ҷасорати идораи давлатро ба уҳда намегирифт. Баъди талошҳои зиёд вакилони мардумӣ  ин масъулияти гаронро ҷавонмарди 40 – сола Эмомалӣ Раҳмон, ки вакили Шурои Олии ҷумҳурӣ аз ҳавзаи интихоботии Данғара буд, ба зимма гирифт.  Эмомалӣ Раҳмон бо дастгирии ҷонибдорони Ҳукумати конститутсионии навташкил бо шуҷоату мардонагӣ садҳо хатарро паси сар карда, миллатро аз парокандагӣ ва давлатро аз нестшавӣ наҷот доданд. Дар дили мардум шуълаи умед ба зиндагӣ дубора фурӯзон гардид. Оҳиста – оҳиста Тоҷикистони аз ҷанги шаҳрвандӣ баромада  ба сӯйи дастоварду комёбиҳо ва ободиҳои бесобиқа қадамҳои боэътимод гузошт.

Мардуми  Тоҷикистон таҳти роҳнамои Сарвари давлат муҳтарам Эмомалӣ Раҳмон  ба бунёди ҷомеаи демократӣ, ҳуқуқбунёд, ягона ва дунявӣ шуруъ карданд. Тоҷикистон аз бунбасти коммуникатсионӣ раҳо ёфта, амнияти энергетикӣ ва хӯроквории худро таъмин кард ва рӯ ба саноатикунонии босуръат рӯ овард. Бо роҳнамоӣ ва дастуру супоришҳои Сарвари давлат аънана ва маросимҳои миллӣ эҳё гардида, забони тоҷикӣ забони давлатӣ шуд.

Соли 2015 Маҷлиси Олии Ҷумҳурии Тоҷикистон, ки аз ду палата иборат аст, Қонуни  Олии Ҷумҳурии Тоҷикистон «Дар бораи Асосгузори сулҳу ваҳдати миллӣ – Пешвои миллат»-ро қабул ва расмӣ кард ва хизматҳои шоистаи Президенти Ҷумҳурии   Тоҷикистон Эмомалӣ Раҳмон дар назди халқу Ватан ро ба назар гирифта,  ин унвони фахриро ба ӯ муносиб донист.

Сиёсати хирадмандона, оқилона, сулҳҷуёна ва созандаи Асосгузори сулҳу ваҳдати миллӣ – Пешвои миллат Президенти Ҷумҳурии Тоҷикистон муҳтарам Эмомали Раҳмон дар давоми беш аз 30  сол дар тамоми соҳаҳои хоҷагии халқ  рушду такомули бесобиқа ба амал омад.

Аз ҷумла дар соҳаи тандурустӣ, ки таҳти таваҷҷуҳи ҳамешагии Пешвои миллат қарор дорад, дар зарфи ин солҳо  бо таҷҳизоти тиббии замонавӣ ва мутахассисони тиббӣ таъмин шуда, табибон касалиҳои дилу чашм ва дигар ҷарроҳии нодири узвҳоро дар муассисаҳои тиббии ватанӣ бомаҳорат амалӣ мегардонанд.

Имрӯз дар кишварамон барои мубориза бо касалиҳои сил, диабет, саратон, маризиҳои дил, наъамандӣ ва ғайра 12 барномаи миллӣ роҳандозӣ шудааст. Дар соҳаи тандурустӣ ислоҳот дар ёрии аввалини тиббӣ-санитарӣ ва тибби оилавӣ, инчунин баҳри ҳифзи сиҳатии модару кӯдак ба амал омад.

Дар 30 соли охир дар мамлакат теъдоди беморхонаҳо зиёд шуда, онҳо бо таҷҳизоти техникии ҳозиразамон ҷиҳозонида шуда, кормандони тиб дар курсҳои бозомузӣ таҷриба меомӯзанд. Масалан, дар солҳои 90-ум дар Тоҷикистон ҳамагӣ 2,5 ҳазор муассисаҳои тиббӣ ба мардум хизмат мерасонданд. Имрӯз ин теъдод ду маротиб афзуда, ба 4,3 ҳазор расидааст.

Пешвои миллат муҳтарам Эмомалӣ Раҳмон ҳангоми ироаи Паёмаш ба Маҷлиси Олии мамлакат гуфта буданд, ки дар солҳои соҳибистиқлолӣ шумораи аҳолии мамлакат аз 5 миллион нафар дар соли 1991 то ба 10 миллион нафар дар моҳи июли соли 2022 афзоиш ёфтааст. Барои боз ҳам беҳтар намудани сатҳу сифати хизматрасонии тиббӣ ва дастрасии аҳолӣ ба он бунёди муассисаҳои нав, азнавсозии муассисаҳои мавҷуда ва бо таҷҳизоти муосир муҷаҳҳаз гардонидани онҳо зарур мебошад.

Бо ин мақсад, танҳо дар ду соли охир аз ҷониби Ҳукумати мамлакат ба муассисаҳои тандурустии кишвар ба маблағи зиёда аз 1 миллиард сомонӣ беш аз 200 номгӯй таҷҳизоту дастгоҳҳои муосир дастрас карда шудаанд.

Ҷаноби Олӣ дар Паёмашон таъкид намуданд, ки «бо вуҷуди он ки дар самти пешгирӣ кардан ва табобати беморон дастоварду пешравиҳои муайян ба назар мерасанд, вале ҳанӯз масъалаҳои тарбияи кадрҳо, хусусан, дар коллеҷҳои тиббии чи давлатӣ ва чи хусусӣ, аз рӯйи ҳамаи ихтисосҳо бо кадрҳои баландихтисос таъмин намудани муассисаҳои тандурустӣ ва сатҳи хизматрасонӣ ба аҳолӣ мебошад».

Муассисаи давлатии таълимии «Коллеҷи тиббии ҷумҳуриявӣ», ки сентябри соли 2020 аз ҷониби Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ мавриди истифода қарор гирифт, дар тайёр кардани мутахассисони гуногунихтисоси тиб саҳмгузор мебошад.

Салом! Эй Пешво, марди Худодод,

Бикардӣ аз сари нав кишвар обод.

Ҳама аҳсан, ҳама хонем таҳсин

Ба он фарзонамодар, ки туро зод.

Бале, Исмоили Сомон ту ҳастӣ,

Шукӯҳи бахти нурафшон ту ҳастӣ.

Муборак ҷашни Истиқлолу Ваҳдат,

Ба қалби Тоҷикистон ҷон ту ҳастӣ.

Арбобов Хаёйм Муқаддамович

Мудири кафедраи “Технологияи информатсионӣ, ташхис

ва табобати нурӣ”- и МДТ

«Коллеҷи тиббии ҷумҳуриявӣ».

Фарангис НАЗАРОВА,

ассистенти кафедраи

“Технологияи информатсионӣ, ташхис ва табобати нурӣ”- и МДТ «Коллеҷи тиббии ҷумҳуриявӣ».