Бояд қайд кард, ки роҳбарияти коллеҷ барои бо таҳсилоти босифат таъмин намудани донишҷӯёни мо ва ба ҳама меъёрҳои баланд ҷавобгӯ буданаш пайваста кор мекунад. Мо тамоми кувваро ба он равона мекунем, ки дастуру супоришҳои Ҳукумату давлат ва вазорату идораҳои дахлдорро дар сари вақт ва бо сифати баланд иҷро намоем. Ҳадафи мо ин аст, ки ба донишҷӯён ҳама он чизе, ки барои гирифтани таҳсили муваффақ ва рушди касбӣ лозим аст, таъмин намоем. Дар ин ҷода тибқи нақшаҳои тасдиқгардида мунтазам дарсҳои кушоду намунавӣ, семинар-тренингҳои омӯзишӣ, дарсҳои амалӣ дар маркази омӯзиши малакаҳои амалӣ ва дигар чорабиниҳои таълимӣ ва тарбиявӣ баргузор мешаванд. Ҳадафи роҳбари муассиса аз ин ташаббусҳо баланд бардоштани сатҳи саводу маърифати донишҷӯён, пеш аз ҳама, хатмкунандагон, сатҳи баланди тахассуснокӣ, таҷрибаи касбӣ пеш аз оғози фаъолият, ҳисси баланди ватандӯстиву ватанпарварӣ, ҳувияти миллӣ, эҳтиром гузоштан ба забону таъриху фарҳанги қадимаи тоҷикон, тавсеаи ҷаҳонбинии илмиву техникӣ ва рушди илмҳои табииву дақиқ ба шумор меравад.
Возеҳ аст, ки дар соли сипаригашта донишҷӯёни муассисаи мо дар озмунҳои ҷумҳуриявӣ иштирок карда, ба комёбиҳои назаррас ноил гаштаанд. Бо истифода аз фурсат, ман ба ҳамаи иштироккунандагон ва хусусан, ба ғолибони ин озмунҳо аҳсан мегӯям ва бовар дорам, ки онҳо минбаъд низ дар ҳамаи соҳаҳои ҳаёти илмиву фарҳангии мамлакат фаъолу ташаббускор хоҳанд буд.
Бо эътимоди комил изҳор медорам, ки мо дар соли нав низ, якҷо бо омӯзгорону донишҷӯён тамоми саъю кӯшиш ва имкониятҳои худро ба хотири беҳтарсозии раванди таълиму тарбия, пешрафти илму маориф ва дар ин масир ободии Ватани маҳбубамон, боз ҳам баланд бардоштани сатҳу сифати таълим ва пешрафту тараққиёти давлати соҳибистиқлоламон сафарбар менамоем.
Дар соли нав, мо нақша дорем, ки ҳамкориҳои худро бо шарикон дар соҳаи тиб васеъ намоем, то ба донишҷӯён имкониятҳои беназир барои коромӯзӣ ва гирифтани таҷрибаи амалӣ фароҳам оварем. Барномаҳои таълимии мо бо технологияҳо ва усулҳои нав, ки ба тамоюлҳои навтарини илми тиб мувофиқанд, пурра карда мешаванд.
Самти дигари муҳими фаъолияти мо дар соли нави мелодӣ боз ҳам пурзур намудани ғамхории нисбати беҳбудии донишҷӯён ва ҳайати коллективи кормандону омӯзгорон мебошад. Мо барномаҳои навро дар соҳаи фаъолияти ҷисмонӣ, солимии равонӣ ва дастгирии иҷтимоӣ ҷорӣ хоҳем кард, то муҳити омӯзишӣ ба рушди ҳамаҷониба ва рушди касбӣ мусоидат кунад.
Ҳамзамон, дарҳои мо барои фикру мулоҳизаҳо ва пешниҳодҳои шумо боз аст. Назари шумо дар бораи инкишофи ҷараёни таълим ва беҳтарсозии фаъолияти муассиса барои мо муҳим аст. Танҳо бо саъю кӯшиши муштарак мо метавонем фазои бештар муассир ва инноватсионии таълимро эҷод кунем.
Бигзор соли нав барои ҳар яки шумо замони дастовардҳои нав, бозёфтҳои ҷолиб ва шукуфоӣ бошад. Бигзор меҳнати шумо ҳамеша самар бахшад ва ҳар рӯз пур аз лаҳзаҳои дурахшон ва эҳсосоти мусбӣ бошад.
