7  май — Рӯзи ҷаҳонии ихтирои радио ва кормандони соҳаи алоқа мебошад. Ихтирои нахустин дастгоҳи радио соли 1895 аз ҷониби физики рус Александр Попов анҷом дода шуд ва ин ихтироъ ба рушди алоқаи бесим замина гузошт.

Радио имрӯз яке аз воситаҳои фарогири расонидани иттилоот  ба ҷомеа эътироф гардида, дар инъикоси воқеоти рӯзгор, таҳкими асолати миллӣ, рушди давлатдорӣ, тавсеаи ҷаҳонбинии мардум, пойдории адолат ва дӯстию рафоқат нақши муассир дорад.

Истиқлоли давлатӣ дар фазои иттилоотии  Тоҷикистон дигаргуниҳои куллӣ ба амал овард. Зеро дар баробари дигар воситаҳои ахбори омма радио низ рушд карда, дар ҷумҳурӣ шумораи радиоҳои давлатӣ ва мустақил зиёд гардид.                 Тавре ба  АМИТ «Ховар» дар Кумитаи телевизион ва радиои назди Ҳукумати Ҷумҳурии Тоҷикистон хабар доданд, дар айни замон дар ҷумҳурӣ 32 радио фаъолият дорад, ки аз он 10 -радио давлатӣ ва 22 адад хусусӣ мебошад. Ин радиоҳо дар инъикоси воқеияти рӯзгор, таҳкими асолати миллӣ, рушди давлатдорӣ, тавсеаи ҷаҳонбинии мардум, пойдории адолат ва дӯстию рафоқат нақши муассир доранд.

Имрӯз радио ба  ҳама дастрас буда,  дар баробари дигар воситаҳои иттилоърасон байни ҷомеа мавқеи хоси худро касб намудааст, ки метавон онро тариқи телефони мобилӣ, компютер, планшет ва интернет ба таври васеъ истифода бурд.

Имрӯз  дар Тоҷикистон шабакаҳои давлатии Радиои Тоҷикистон,  «Садои Душанбе», «Фарҳанг», «Овози тоҷик», «FM Ховар», радиоҳои ғайридавлатии «Азия-Плюс», «Ватан»,  «Имрӯз», «Русское Радио Ориёно»  ва чандин радиои дигар фаъолият намуда, дар пуррагардонии фазои иттилоотии мамлакат саҳми назаррас мегузоранд.

Бартарии радио аз дигар воситаҳои иттилоърасон дар он аст, ки агар шахс хоҳад рӯзнома мутолиа кунад ё  телевизор тамошо кунад, ҳатман бояд ҳамаи кори худро як сӯ гузошта, таваҷҷуҳи худро пурра ба он равона созад.  Аммо радиоро метавон дар дилхоҳ ҷой  гӯш кард ва паси кори худ шуд.

Ҳатто имрӯз радиоҳои мамлакат барои шунавандагони худ барномаҳои махсусе доранд, ки ба самтҳои мушаххас равона шудаанд. Аз ҷумла, барномаҳои зиёди ҷолибу шуниданӣ  барои ронандагон, ҳаводорони санъати мусиқӣ, иттилоотӣ, барномаҳои ҷашнӣ, тиҷоратӣ, ҳуқуқиву маърифатӣ ва  фарҳангиву варзишӣ дар радиоҳои алоҳидаи мамлакат пахш мегардад,  ки шунавандагони худро доранд.

Ба воситаи радио метавон ба ҳамдигар паём расонда, суруду мусиқии дилхоҳи худро дархост кард. Ҳатто дар замони имрӯза тариқи радио хариду фурӯш низ ба роҳ монда шудааст, ки яке аз роҳҳои муосири тиҷорат мебошад.

Бояд тазаккур дод, ки дар Ҷумҳурии Тоҷикистон тибқи Конститутсия ба ҳар кас озодии сухан, нашр ва ҳуқуқи истифодаи воситаҳои ахбор кафолат дода шудааст. Дар баробари ин аз 14-уми ноябри соли 1996   Қонуни Ҷумҳурии Тоҷикистон «Дар бораи телевизион ва радиошунавонӣ» амал мекунад, ки тамоми самтҳои ташкилию ҳуқуқӣ ва фаъолияти телевизион ва радиошунавониро ба танзим медарорад.

Қаландаров Некруз Ҳакимович

Мудири кафедраи”Фанҳои табиию риёзӣ”

МДТ “Коллеҷи тиббии ҷумҳуриявӣ”