Санаи 2 – юми марти соли 2022 мусобиқаи даставии воллейбол, ки байни донишҷӯписарони МДТ “Коллеҷи тиббии ҷумҳуриявӣ” ташкил карда шуд, ба охир расид.  Мусобиқа санаи 23 феврали соли 2022 баҳри амалисозии Стратегияи давлатии сиёсати ҷавонони Ҷумҳурии Тоҷикистон то соли 2030, тибқи мактуби Вазорати маориф ва илми Ҷумҳурии Тоҷикистон ва бо дастуру супоришҳои бевоситаи Роҳбари муассиса оғоз ёфта, дар он 12 даста аз тамоми факултетҳо ширкат варзиданд. Ҳамчунин, иқдоми мазкур ба оммавигардонии варзиш, баланд бардоштани сатҳи маҳорати варзишӣ, тарбияи ҷисмонӣ, тарғиби тарзи ҳаёти солим ва ҳифзи солимии донишҷӯёни Коллеҷ мусоидат намуда, зимнан донишҷӯёни факултетҳо ҳангоми қувваозмоӣ имкониятҳои ҷисмонии худро муайян месозанд.

Давраи ниҳоии мусобиқаи воллейбол дар майдончаи варзишии бинои асосии МДТ “Коллеҷи тиббии ҷумҳуриявӣ” баргузор шуд. Дар он дастаи факултети “Кори тиббӣ-профилактикӣ” бо ҳарифони худ аз дастаи факултети “Кори фарматсевтӣ (таҳсилоти миёнаи асосӣ)” қувваозмоӣ намуданд. Дар ифтитоҳи мусобиқа муовини директор оид ба корҳои таълимӣ Одилзода И.Ё., муовини директор оид ба корҳои илм ва инноватсия Муминзода Ҷ.С., муовини директор оид ба таълими амалӣ Давлатзода А.Д. ва муовини директор оид ба корҳои хоҷагӣ ва маъмурӣ Мамурзода Д.М. дар бораи ҳадафҳои гузаронидани мусобиқа суханронӣ намуданд.

Дастаҳои пешсаф дар ҷараёни давраи ниҳоӣ бозии хуб нишон доданд ва гуфтан ба маврид аст, ки мусобиқа дар як фазои хуби дӯстона бо ҷаззобияти хос мегузашт. Зимни сабқат дастаи факултети “Кори тиббӣ-профилактикӣ” бо нишон додани бартарияти варзишӣ ҷойи аввал ва дастаи факултети “Кори фарматсевтӣ (таҳсилоти миёнаи асосӣ)” ҷойи дуюмро ишғол намуданд.

Дар охир дастаи беҳтарин соҳиби Ҷоми Коллеҷ оид ба воллейбол ва бозингарони беҳтарин бошанд бо медалу ифтихорномаҳо қадрдонӣ карда шуданд.

Пеш 1 то 13 саҳифа Баъдӣ