Ҷаласаи Шӯрои директорони муассисаҳои таҳсилоти миёнаи касбии Ҷумҳурии Тоҷикистон фаъолияти худро дар асоси низомномаи Шуро ва нақшаи солона ба роҳ монда, санаи 10-июни соли равон дар Коллеҷи тиббии ҷумҳуриявӣ ҷаласаи навбатии Шуро баргузор гардид.
Дар ҷаласа муовини Вазири маориф ва илми Ҷумҳурии Тоҷикистон, муҳтарам Абдулхолиқзода Лутфия Абдулхолиқ, намояндаи Агентии назорат дар соҳаи маориф ва илми назди Президенти Ҷумҳурии Тоҷикистон ва намояндаи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон иштирок намуданд.
Нахуст ҷаласаро Раиси Шӯрои директорони муассисаҳои таҳсилоти миёнаи касбии Ҷумҳурии Тоҷикистон Ашуриён Ш. С. ифтитоҳ намуда, қайд карданд, ки баргузории Шӯрои директорон ва таҳлилу барраси рӯзномаи Шӯро дар баланд гардидани сатҳу сифати таълим ва дурнамои шароити таълими муассисаҳои таҳсилоти миёнаи касбӣ мусоидати калон менамоянд.
Тибқи нақшаи кории ҷаласаи директорони муассисаҳои таҳсилоти миёнаи касбии Ҷумҳурии Тоҷикистон масъалаҳои зерин дар ҷаласа мавриди таҳлил ва баррасӣ қарор гирифтанд:
1.Фаъолияти раиси Шӯро дар давраи солҳои 2017-2021
2.Интихоби ҳайати нав, раис ва муовини раиси Шӯрои директорон барои панҷ соли оянда.
3.Таҳия ва тасдиқи нақшаи кории Шӯро барои соли 2022
4.Тартиби гузаронидани аттестатсияи омӯзгорони муассисаҳои таҳсилоти миёнаи касбии ҷумҳурӣ
5.Тартиби пардохти музди меҳнати кормандону омӯзгорони муассисаҳои таҳсилоти миёнаи касбӣ тибқи низомнома.
6.Мушкилоти ҷойдошта дар санадҳои меъёрӣ-ҳуқуқии муассисаҳои таҳсилоти миёнаи касбӣ ва роҳҳои бартараф намудани онҳо
7.Муаррифии директорони навтаъин ва шомил намудани онҳо ба аъзои раёсати Шӯрои директорон барои соли 2022

Дар идомаи ҷаласа директори муассисаи давлатии маркази ҷумҳуриявии таълимию методии назди Вазорати маориф ва илми Ҷумҳурии Тоҷикистон Мирзозода Раҳмоналӣ Раҷаб оид ба мушкилоти ҷойдошта дар санадҳои меъёрӣ-ҳуқуқии муассисаҳои таҳсилоти миёнаи касбӣ баромад намуда, зикр карданд, ки барои дар оянда баланд бардоштани сатҳу сифати таълим бояд санадҳои меъёрӣ-ҳуқуқӣ, барномаҳои таълимии ҷойдоштаи муассисаҳои таҳсилоти миёнаи касбӣ ҷиддӣ таҷдиди назар карда шаванд.
Зимни баргузории Шӯрои директорони муассисаҳои таҳсилоти миёнаи касбии Ҷумҳурии Тоҷикистон ва баррасии масъалаҳои рӯзномаи Шӯро қайд карда шуд, ки дар раванди ҷаҳонишавӣ, баланд бардоштани сатҳу сифати таълиму тарбия дар замони муосир ва истифодаи мақсадноки ҳамкориҳои дохилию хориҷии муассисаҳои таҳсилоти миёнаи касбӣ ба тамоми самтҳои таълиму тарбия диққати ҳаматарафа равон карда шавад, ки дар оянда кадрҳои ба бозори меҳнат ҷавобгӯ омода гардад.
Маврид ба ёддоварист, ки дар ҷаласа муовини Вазири маориф ва илми Ҷумҳурии Тоҷикистон, муҳтарам Абдулхолиқзода Лутфия Абдулхолиқ баромад намуда, қайд карданд, ки дар амал татбиқ намудани сиёсати маорифпарваронаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон яке аз вазифаҳои аввалиндараҷаи ҳар яки мову Шумо маҳсуб меёбад.
Бояд қайд намуд, ки дар ҷаласа барои бозҳам фаъолияти хуби Шӯрои директорони муассисаҳои таҳсилоти миёнаи касбӣ дар давоми 5 соли оянда ба вазифаи Раиси Шӯрои директорони муассисаҳои таҳсилоти миёнаи касбӣ директори Коллеҷи муҳандисию омӯзгории шаҳри Душанбе Ширинзода Н. А. ва ба вазифаи муовини раиси Шӯрои директорони муассисаҳои таҳсилоти миёнаи касбӣ директори Коллеҷи омӯзгории ба номи Хосият Махсумоваи ДДОТ ба номи С. Айнӣ Одиназода Л. таъйин гардид.
Ҳамзамон, ҷиҳати бартараф намудани камбудиҳои ҷойдошта дар соли сипаришуда дар самти таълиму тарбия, баланд бардоштани шарту шароити таълим, сифатнокии таълим, зиёд намудани кадрҳои болаёқат, ва ҷалби донишҷӯёну наврасон ба китобу китобхонӣ, илмҳои табиатшиносӣ, дақиқ ва риёзӣ барои соли 2022 дар пеши раис, муовин ва раёсати нави Шӯрои директорони муассисаҳои таҳсилоти миёнаи касбии Ҷумҳурии Тоҷикистон вазифаҳои мушаххас гузошта шуд.