Пеш 1 то 2 саҳифа Баъдӣ

Модар – бузургтарин неъмати илоҳист!

Барои посдории қадру манзалати модар дар ҳама давру замон ҷашнвораҳо баргузор мегардиданд. Дар Иттиҳоди Шуравӣ 8 март ҳамчун рӯзи байналхалқии занон ҷашн гирифта мешуд. Баъди соҳибистиқлол гаштани давлати азизамон бо қарори Маҷлиси Олии Ҷумҳурии Тоҷикистон аз 3 ноябри соли 1995 таъғиротҳо ба Қонуни Ҷумҳурии Тоҷикистон «Дар бораи рӯзҳои ид» ворид шуд, ки тибқи он номгузории «Рӯзи байналхалқии занон» — ро ба Рӯзи модар иваз намуданд ва ин ҳам ба хотири  баланд бардоштани мавқеи зан-модар дар ҷомеа мебошад.

Ҳамчунин дар арафаи рӯзи 8 март ба муносибати модарон – бо ташаббуси мақомотҳои давлатӣ, ташкилотҳои ҷамъиятӣ ва ҷузъу томҳои низомӣ чорабиниҳои ҷамъиятию сиёсӣ андешида мешаванд.  Нисбати модарон ва занон чорабиниҳои идонаи фарҳангӣ баргузор мегарданд. Пешвои муаззами миллат – Президенти Ҷумҳурии Тоҷикистон, мӯҳтарам Эмомалӣ Раҳмон модарону бонувонро бо иди Рӯзи модар табрику муборакбод менамоянд.

8 март — тибқи Қонуни Ҷумҳурии Тоҷикистон «Дар бораи рӯзҳои ид», рӯзи истироҳат муқарар шудааст, ки ин ҳам яке аз нишондиҳандаҳои қадру манзалати модар дар назди Ҳукумату давлат ба шумор меравад.

Асосгузори сулҳу ваҳдати миллӣ, Пешвои муаззами миллат – Президенти кишвар мӯҳтарам Эмомалӣ Раҳмон қайд карданд, ки:

“Модар шахсест, ки шабу рӯз ба хотири роҳату осоиши тифлаш заҳмат мекашад ва намегузорад, ки фарзанди ӯ ранҷу озоре бинад. Вай ҳамеша дар талош аст, ки фарзандаш солиму бардам ба камол расад, соҳиби одобу маърифат, илму дониш ва касбу ҳунар гардад ва дар оянда ба ҷомеа хизмати шоиста намояд”

Аз ашъори Лоиқ ду мисра гуфтаниам, ки:

Сад ҷону дил фидои як муддаои модар,

Фатҳу кушоиш орад дасти дуои модар.

    Бешак, сарчашма ва сабаби ҳастии башарият Зан – Модар аст. Бонувони иззатманди кишварамон таҷассуми хираду маърифат, одобу ахлоқи ҳамида ва ободии рўзгору пешрафти ҳаёти ҷомеа мебошанд.  Бузургии Зан – Модар, пеш аз ҳама, дар он таҷассум меёбад, ки ў чароғи хонадон, идомадиҳандаи насл, тарбиякунанда ва ба камол- расонандаи фарзанд, инчунин нигоҳдорандаи забон, таърих ва фарҳанги миллӣ мебошад.

Ин суханҳо ва сатрҳо бори дигар собит месозанд, ки ҳаёти ҳар як инсон дар дасти модаре, ки бароямон наздиктарин ва азизтарин шахс маҳсуб меёбад – оғоз мегирад. Муҳаббат ва дуои модарон ба мо қувват мебахшанд ва кӯмак мекунанд, ки мо душвориҳоро ба осони паси сар гардонем.

Аз фурсати муносиб истифода бурда, бо як ҳисси эҳтироми хос тамоми бонувони муассиса ва ҷумҳуриамонро, ки бешубҳа модар маҳсуб меёбанд – бо иди фархундаи дар пешистода – Рӯзи Модарон табрик менамоям!

Бароятон аз самими қалб сулҳу субот, ҳамдигарфаҳмӣ ва хушбахтии оилавиро таманно дорам. Бигзор ҳаёт ба шумо танҳо лаҳзаҳои шодмонӣ, хушбахтӣ, табассуми фаровон ва табъи болида бахшад. Ташаккур ба шумо барои муҳаббат, фидокорӣ, шабҳои бехоби, ғамхорӣ ва меҳрубонӣ. Ба шумо умри дарозу бобаракат, саломатӣ, зиндадилӣ ва нерӯи тамомнашаванда орзумандам!

АШУРИЁН Шаҳло Сайфуллозода – директори МДТ “Коллеҷи тиббии ҷумҳуриявӣ”