Санаи 22 майи соли 2023 тибқи дастури роҳбари Муассиса номзади илмҳои тибб Ашуриён Шаҳло Сайфуллозода ва нақшаи чорабиниҳои самти тарбия дар бинои фарҳангии муассиса бахшида ба “Рӯзи ҷавонони Тоҷикистон” ҳамоиш таҳти унвони “ДУНЁ ПУР АЗ ҶАВОНИСТ…” бо як ҳисси баланди ватандӯстию меҳанпарастӣ баргузор гардид.
Дар ҳамоиш меҳмон аз Раёсати кор бо ҷавонон ва варзиши шаҳри Душанбе, муовини раиси Филиали Иттифоқи ҷавонони Тоҷикистон дар шаҳри Душанбе Ҳамрози Ҳамза, директори Муассиса н.и.т. Ашуриён Ш. С., муовини директор оид ба корҳои таълимӣ н.и.т. Одилзода И. Ё., муовини директор оид ба корҳои илмӣ – методӣ, инноватсия ва робитаҳои байналмилалӣ Муминзода Ҷ. С., муовини директор оид ба корҳои тарбиявӣ Саидова М. М., муовини директор оди ба корҳои маъмури ва хоҷагидорӣ Мамурзода Д. М., сардорони шуъбаҳо ва омӯзгорону донишҷӯён иштирок намуданд.
Дар қисмати аввали чорабинӣ меҳмонон ба коллеҷ ташриф оварда, аз дастовардҳои коллеҷ дидан намуданд. Баъдан меҳмонон барои тамошои чорабинии тантанавӣ ба толори фарҳангии коллеҷ раҳсипор гаштанд.
Сараввал директори Муассиса н.и.т. Ашуриён Ш. С. суханронӣ намуда, ҳозиринро ба “Рӯзи ҷавонони Тоҷикистон” самимона табрик намуда, қайд намуданд: “Имрӯз мо дар арафаи таҷлили “Рӯзи ҷавонони Тоҷикиситон” қарор дорем, ки ҳамасола онро мо дар як фазои сулҳу дӯстӣ ва муҳаббат ба Ватан санаи 23 май ҷашн мегирем. Ин рӯз барои ҷавонони кишвари мо як рӯйдоди муҳим ба шумор меравад, зеро ҷавонон ояндаи миллати мо мебошанд. Таҷлили “Рӯзи ҷавонони Тоҷикистон” нишондиҳандаи арҷгузории Ҳукумати кишвар ба ин қувваи бузурги созанда мебошад, ки нерӯи пешбарандаи ҷомеаи мо буда, дар рушди кишварамон саҳми арзанда мегузоранд.
Асосгузори сулҳу ваҳдати миллӣ – Пешвои миллат, Сарвари давлат, муҳтарам Эмомалӣ Раҳмон дар яке аз баромадҳои худ гуфтаанд, ки: “Ҷавонон мояи ифтихор ва сарбаландии Тоҷикистони азиз мебошанд”. Бе шак мо аз ҷавонони ватандӯсту содиқи худ ифтихор мекунем. Ҷавонони кишварамон дар лоиҳаҳои хурду бузурги гуногун, ки ба беҳбудии зиндагии мардум нигаронида шудаанд, фаъолона ширкат меварзанд. Онҳо пешвоёни ҳақиқӣ ва намунаи ибрат мебошанд.”
Баъдан Ҳамрози Ҳамза – намояндаи Раёсати кор бо ҷавонон ва варзиши шаҳри Душанбе суханронӣ намуда, Паёми табрикотии Раёсатро ба саҳми ҳозирин расонида, бори дигар ҳамаи ҷавононро ба ин рӯзи фархундаашон шодбош намуда, ба чорабинӣ ҳусни ифтитоҳ бахшиданд.
Дар қисмати фарҳангии чорабинӣ, дастаи ҳаваскорони “Шифобахш” бо шеъру сурудҳои дилнишин, бадеҳа, саҳначаи тарбиявӣ ва рақсҳои хиромону зебо дили ҳозиринро шод намуданд.
Дар қисми хотимавӣ, Сипосномаи Раёсати кор бо ҷавонон ва варзиши шаҳри Душанбе барои дар сатҳи баланд ташкил ва баргузории ҳамоиш бахшида ба “Рӯзи ҷавонони Тоҷикистон” ба Роҳбарияти коллеҷ тақдим карда шуд. Инчунин омӯзгорон ва ҷавонони фаъоли коллеҷ, ки дар Олимпиадаи Ҷумҳуриявии донишҷӯёни Муассисаҳои таҳсилоти миёнаи касбии Ҷумҳурӣ аз рӯи фанҳои табиатшиносию риёзӣ ва Олимпиадаи фанҳои тахассусӣ ҷойҳои ифтихорӣ насибашон гашта буд, аз тарафи Маъмурияти коллеҷ бо ифтихорномаҳо ва маблағҳои пулӣ сарфароз гардонида шуданд.
Бо эътимоди комил метавон гуфт, ки ҷавонони ватандусти муассиса аз уҳдаи иҷрои қарзи ватандорӣ ва фарзандии худ сарбаландона мебароянд, арзишҳои миллиро ҳифз мекунанд, амнияту оромии Ватани азизамонро шабу рӯз ҳимоя менамоянд ва бо ҳисси баланди масъулиятшиносӣ ба хотири рушди Тоҷикистони биҳиштосоямон минбаъд низ саъю талош мекунанд.
Бори дигар шумо ҷавонони азизро ба ифтихори “Рӯзи ҷавонони Тоҷикистон” шодбош гуфта, ба ҳар яки шумо тандурустӣ ва дар кору фаъолияти созандаатон иродаи қавӣ ва барору комёбӣ орзумандам.
Ҷашн муборак, табибони ҷавони ояндаи Тоҷикистон!
Пеш
1 то 47 саҳифа
Баъдӣ
