Дар замони муосири рушди илму технологияҳои иттилоотӣ ва ивазшавии мунтазами талабот ба омодасозии кадрҳои ҷавобгӯ ба талаботи бозори меҳнат, баргузории вохўриҳо ва ҷаласаҳои стратегӣ дар муассисаҳои таълимӣ ба ҷузъи ҷудонашавандаи фаъолият табдил ёфтааст. Ҳамкории самарабахши ҳамаи бахшу сохторҳои муассисаи таълимӣ дар чунин вохӯриҳо имкон медиҳад, ки қарорҳои муҳиме, ки ба беҳтар намудани раванди таълим ва фароҳам овардани фазои мусоиди таълим нигаронида шудаанд, баррасӣ ва муҳокима карда шаванд.

Дар ин замина, тибқи нақша санаи 6 феврали соли 2024 ҷаласаи навбатии назди директори МДТ “Коллеҷи тиббии ҷумҳуриявӣ”, н.и.т. Ашуриён Шаҳло Сайфуллозода баргузор гардид, ки мисоли равшани ин муносибат буд. Дар ин ҷаласа тамоми ҳайати роҳбарикунандаи бахшу сохторҳои асосии муассисаи таълимӣ: аз муовинони директор то мудирони кафедраҳо ширкат варзиданд. Зиёда аз 40 нуқтаҳои асосии фаъолияти таълимӣ, тарбиявӣ ва таҷрибаомӯзӣ баррасӣ гардиданд. Дар натиҷа ин ҷаласа имкон дод, ки оид ба самтҳои гуногуни фаъолияти Коллеҷ қарорҳои стратегӣ барои баланд бардоштани сифати таълим, рушди фаъолияти илмӣ, инчунин баланд бардоштани рӯҳияи ватандӯстии донишҷӯён баҳри иштирок дар ҳаёти ҷамъиятӣ таҳия карда шаванд.

Яке аз нуқтаҳои асосие, ки дар ҷаласа муҳокима шуд, ҷонноксозии назорат аз болои иҷрои риояи либосҳои тавсиявӣ буд. Ин қадам ба эҷоди шахсияти ягонаи коллективӣ ва таҳкими ҷомеаи донишҷӯёни коллеҷ нигаронида шудааст. Илова бар ин, масъалаҳои аттестатсияи ҳайати омӯзгорон мавриди баррасӣ қарор гирифтанд, ки барои баланд бардоштани маҳорати касбӣ ва сифати таълим мусоидат мекунанд.

Ба ривоҷи фаъолияти илмӣ дар коллеҷ низ диққати хос дода шуд. Дар ин ҷода ба мудирони кафедраҳо дастур дода шуд, ки соле се маротиба чорабиниҳои илмӣ ташкил ва баргузор намоянд. Ин амал ба ҳайати омӯзгорон имкон медиҳад, ки дастовардҳои илмии муосирро дар раванди таълим фаъолона ҷорӣ намоянд, ки ин дар навбати худ ба амиқтар аз худ намудани мавод аз ҷониби донишҷӯён мусоидат мекунад.

Дар байни дигар ташаббусҳои муҳим, ки дар ҷаласа муҳокима шуданд, машқҳои пагоҳирӯзии ҷисмонии омӯзгорону донишҷӯёнро махсус қайд кардан лозим аст, ки ин ба нигахдории саломатии онҳо ва баланд бардоштани самаранокии ҷараёни таълим мусоидат мекунад. Ҳамчунин машқҳои пагоҳирӯзӣ як усули беҳтарини тарғиби тарзи ҳаёти солим миёни ҷомеа мебошад.

Алоҳида бояд қайд кард, ки роҳбари муассиса ба масъулон дастур доданд, ки баҳри додани маълумоти мухтасар оид ба Паёми ироагардидаи Пешвои муаззами миллат, тавзеҳи паём бо иштироки омӯзгорон миёни донишҷӯён бо фарогирии кулли хонандагони муассиса гузаронида шавад. Дар ин партав дастур дода шуд, ки дар соатҳои тарбиявӣ тавзеҳи Паём ҷой карда шуда, мунтазам гузаронида шавад. Инчунин барои омодагӣ ба ҷашни байналмилалии Наврӯз ва дигар ҷашнвораҳо, ба масъулин дастуру супоришҳои мушаххас дода шуд. Аз ҷумла, ҷалби ихтиёриён барои иштирок дар роҳпаймоиҳо, гузаронидани шанбегиҳо ва дигар қарорҳо қабул карда шуданд.

Қайд кардан муҳим аст, ки ҳамаи ин қарорҳо бо назардошти фикру андеша ва манфиатҳои ҳамаи иштирокчиёни раванди таълим қабул шудаанд, ки хусусияти демократӣ ва ошкорои кори коллеҷро таъкид мекунад.

Ҳамин тариқ, ҷаласаи имрӯзаи директори МДТ “Коллеҷи тиббии ҷумҳуриявӣ” н.и.т. Ашуриён Шаҳло Сайфуллозода дар самти навсозӣ ва такмили раванди таълим, инчунин баланд бардоштани рӯҳияи ватандӯстии донишҷӯёни муассисаи таълимӣ як қадами муҳим буд.

Пеш 1 то 23 саҳифа Баъдӣ