Пеш 1 то 49 саҳифа Баъдӣ

Гузаронидани Олимпиадаҳои тахассусӣ дар сатҳи ҷумҳуриявӣ, барои баланд бардоштани сатҳи сифати таълими тиббӣ ва омодасозии мутахассисони соҳибтахассус дар соҳаи тандурустӣ нақши муҳим мебозад. Дар шароити пайваста таъғирёбандаи амалияи тиббӣ ва пайдоиши чолишҳои нави соҳаи тандурустӣ, чунин чорабиниҳо воситаи зарурии санҷиши дониш, малака ва маҳорати хонандагон, инчунин ҳавасмандгардонии муассисаҳои таълимӣ ба такмили мунтазами барномаҳои таълимӣ ва усулҳои таълим мегарданд.

Дар робита бо гуфтаҳои боло ва баҳри амалигардонии Нақшаи чорабиниҳо барои солҳои 2020-2025 оид ба амалигардонии “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф”, бо ташаббуси Вазорати тандурустӣ ва ҳифзи иҷтимоии аҳолии Ҷумҳурии Тоҷикистон санаҳои 10-11 майи соли 2024 дар муассисаи давлатии таълимии “Коллеҷи тиббии ҷумҳуриявӣ” Олимпиадаи тахассусӣ байни донишҷӯёни муассисаҳои таҳсилоти миёнаи касбии тиббии ҷумҳурӣ, аз рӯи фанҳои тахассусии Кори ҳамширагӣ, Кори момодоягӣ, Кори дандонсозӣ, Кори фарматсевтӣ ва Кори табобатӣ гузаронида мешавад

Интихоби МДТ “Коллеҷи тиббии ҷумҳуриявӣ” ҳамчун макони баргузории Олимпиада на танҳо бо хоҳиши фароҳам овардани имкониятҳои баробар барои ҳамаи иштирокчиён, балки инчунин бо имкониятҳои инфрасохторӣ ва таҷрибаи ин муассисаи таълимӣ дар ташкили чорабиниҳои калон асоснок карда шудааст. Ҷойгиршавӣ дар маркази ҷумҳурӣ коллеҷро барои донишҷӯён аз манотиқи гуногуни кишварамон дастрас намуда, ин дар навбати худ барои фарогирии ҳадди аксар иштирокчиён мусоидат мекунад. Гузашта аз ин, МДТ “Коллеҷи тиббии ҷумҳуриявӣ” бузургтарин муассисаи таълимии соҳаи худ буда, барои бомуваффақият амалӣ намудани чорабиниҳои ин миқёс фазо ва захираҳои кофӣ фароҳам меоварад.

Бар асоси ин омилҳо баргузории Олимпиада дар МДТ “Коллеҷи тиббии ҷумҳуриявӣ” нақши онро дар рушди маорифи тиббии Тоҷикистон таъкид намуда, омодагӣ ва тавоноии ин муассисаро барои баргузор намудани чорабиниҳои босифату масъулиятнок дар сатҳи ҷумҳуриявӣ нишон медиҳад.

Ҳамин тариқ ба ҳайси раёсат ва аъзоёни комиссияи салоҳиятноки Олимпиада кормандони варзидаи соҳаи тандурустӣ шомил буданд. Аз ҷумла академики академияи илмҳои тиббӣ, доктори илмҳои тиб, профессор Юсуфӣ Саломуддин Ҷаббор – сардори Раёсати таҳсилоти тиббию фарматсевтӣ, сиёсати кадрҳо ва илми Вазорати тандурустӣ ва ҳифзи иҷтимоии аҳолии Ҷумҳурии Тоҷикистон – Раиси комиссия, Абдуллоев Р.А. – мутахассиси пешбари ҳамин сохтор – муовини раиси комиссия ва инчунин дигар кормандони варзидаи соҳаи тандурустӣ ба ҳайси аъзоёни комиссия иштирок доштанд. Пеш аз оғози Олимпиада, директори МДТ “Коллеҷи тиббии ҷумҳуриявӣ” н.и.т. Ашуриён Шаҳло Сайфуллозода бо ҳамроҳии меҳмонон аз осорхонаи муассиса, ки дар бинои маъмурии муассиса ҷойгир аст, дидан намуда, меҳмонон ба таърихи коллеҷ, ки аз дастовардҳо ва анъанаҳои бой, ки зиёда аз 88 сол дорад, ғарқ шуданд. Ин сайругашт як роҳи беҳтарин барои шиносоӣ кардани ҳамаи иштирокчиён бо аҳамияти ин муассиса ва саҳми он дар илм ва амалияи тиб буд.

Раванди Олимпиада бо як тартиби хос ба нақша гирифта, амалӣ карда шуд. Пас аз бақайдгирӣ, комиссия бо роҳбарии намояндагони Вазорати тандурустӣ ва ҳифзи иҷтимоии аҳолии ҷумҳурӣ марҳилаҳои баргузории чорабиниро аниқ намуда, барои ҳар як ихтисос комиссияҳо ҷудо карданд. Донишҷӯёнро ба гурӯҳҳо тақсим намуда, ба синфхонаҳои алоҳида фиристоданд ва дар он ҷо ба онҳо билетҳо бо саволҳо аз рӯи ихтисос дода шуданд. Истифодаи варақаҳои махсуси рамздор барои арзёбӣ, имкони донистани шахсияти ҳамдигарро аз байн рабуда, ин амал имкон медиҳад ки баҳогузорӣ объективӣ ва одилона таъмин карда шавад.

Олимпиада, ки дар он 208 нафар донишҷӯён аз 29 коллеҷҳои тиббии давлатӣ ва хусусӣ иштирок доранд, дар рушди маорифи тиббӣ дар ҷумҳурӣ як қадами муҳим хоҳад гашт. Дар қиёс бо солҳои гузашта миқдори иштирокчиён ба 27 фоиз афзуда, алоҳида бояд қайд кард, ки имсол як чанд муассисаҳои таҳсилоти миёнаи касбии тиббии навбунёд дар он бори аввал иштирок хоҳанд кард. Ҳамаи иштирокчиёни Олимпиада як рӯз қабл аз манотиқи гуногуни кишвар, хоса аз минтақаҳои дурдаст ба мисли шаҳри Хоруғ, шаҳри Хуҷанд, ноҳияи Ховалинг, ноҳияи Рашт, шаҳри Кулоб ва дигарон ҳозир шуда бо хобгоҳ таъмин гаштанд.

Ҳамин тариқ Олимпиада дар МДТ “Коллеҷи тиббии ҷумҳуриявӣ” бомаром идома дорад ва мо ба шумо оид ба натиҷаҳо хабар хоҳем дод.