Устодон ва донишҷӯёни муҳтарам! Ҳамдиёрони гиромӣ!

Имрӯзҳо дар саросари кишвар иди муҳим ва фараҳбахш — Рузи ҷавонон қайд карда мешавад. Ин рӯз рамзи қувват, нерӯ ва тавоноии ҷавононест, ки на танҳо оянда, балки имрӯзи кишварамон мебошанд.

Барои мо, омӯзгорон ва маъмурияти коллеҷ, ифтихор ва шодии хос аст, ки шумоёнро бо ин рӯйдоди наҷиб табрик намоем. Ба ҷавонон муроҷиат намуда, гуфтаниам, ки шумо ояндаи мо буда, масъулияти рушду нумӯи ҷомеаи мо дар дасти шумост. Маҳз шумо бо нерӯи худ, идеяҳои тоза ва хоҳиши беандоза ба донишомӯзӣ фардоро ташаккул медиҳед.

Бо истифода аз фурсат, ба ҳамаи ҷавонон, хоса донишҷӯён барои меҳнат, саъю талош дар роҳи донишандузӣ ва хоҳиши зиёди мутахассиси соҳибкасби соҳаи тиб гаштан аз самими қалб миннатдорӣ баён намоям. Фидокорӣ ва матонати шумо бетаъсир намемонад ва мо аз ҳар яки шумо ифтихор дорем.

Мехостам ба устодони гиромӣ ва кормандони муассиса низ изҳори миннатдории хос баён намоям. Сабру таҳаммул, кордонӣ ва фидокории шумо дар ташаккул ва камолоти шогирдони мо нақши калидӣ мебозад. Шумо на танҳо дониш меомӯзонед, балки хислати шогирдонро ташаккул дода, дар вуҷуди онҳо ҳисси масъулиятшиносӣ ва хоҳиши рушди худшиносиро мепарваред.

23 май дар ҳаёти ҷавонони кишвар нақши арзишманду таърихӣ дорад. Чун, ки маҳз ҳамин саннаи соли 1997 Сарвари маҳбуби кишварамон муҳтарам Эмомалӣ Раҳмон дар вохӯрии навбатиашон бо ҷавонони лаёқатманд 23 майро Рӯзи ҷавонон эълон намуданд.

Ногуфта намонад, ки Ҳукумати кишвар, таҳти сарварии Асосгузори сулҳу ваҳдати миллӣ – Пешвои миллат, Президенти кишвар муҳтарам Эмомалӣ Раҳмон ҷавононро дар ҳама кор, ҳамаҷониба дастгирӣ менамоянд. Сарвари давлат борҳо аҳамияти нақши ҷавононро дар ҷомеаи муосир таъкид намуда, дар яке аз паёмҳои худ таъкид сохтанд, ки: “Ҷавонон сарвати асосии кишвар буда, ояндаи мо аз он вобаста аст, ки мо ҷавононро чӣ гуна тарбия ва дастгирӣ менамоем.” Ин суханон барои мо дастурамал шуда, моро ба фароҳам овардани шароит барои камолоти ҳамаҷонибаи ҳар як ҷавон рӯҳбаланд мекунанд.

Донишҷӯёни азиз!

Бигзор ин Рӯзи ҷавонон ба шумо шодиву илҳом бахшад ва хотиррасон намояд, ки барои ноил шудан ба ҳадафҳои аз ҳама бузургатон тамоми имкониятҳо мавҷуданд. Аз орзу кардан натарсед, дар назди худ ҳадафҳои баланд гузоред ва суботкорона аз паи онҳо бошед. Ба худ бовар кунед ва ҳатман ба муваффақият ноил мешавед.

Ид муборак, дустони азиз! Ба ҳамаи шумо саломатӣ, бахту саодат, беҳбудӣ ва комёбиҳои нав орзумандам. Бигзор ҳар рӯзи ҳаёти шумо пур аз шодӣ, кашфиётҳои ҷолиб ва дастовардҳо бошад. Бигзор майлу хоҳиши шумо ба дониш ва такмили худ ҳеҷ гоҳ хомӯш нашавад.

Рӯзи ҷавонон муборак!

Бо камоли эҳтиром,

директори МДТ “Коллеҷи тиббии ҷумҳуриявӣ”

н.и.т. Ашуриён Шаҳло Сайфуллозода